CINE / PROGRAMACIóNInicio

Almoina: o heroe infame Almoina: o heroe infame / Día 8 de Maio. Hora: 19:30 / Salón de Actos da Casa do Saber
Director: Breogán Riveiro
País: España
Ano: 2018
Xénero: Documental
Duración: 60 minutos
Produción: Formato Producciones
Guión: Breogán Riveiro
Dirección de Fotografía: Diego Dójer
Montaxe: Juan Sánchez

SINOPSE:

José Almoina Mateos naceu en Lugo, fillo dun importante médico local. Despois foi membro do PSOE, masón, deputado, represaliado e perseguido na guerra civil, exiliado, profesor na Universidade de Santo Domingo e secretario persoal do ditador Trujillo, o home polo que pasaban todos os documentos dun gobernante megalómano e homicida. Un traballo indigno, polo que foi expulsado do PSOE e polo que moitos exiliados o condenan ao ostracismo.

Gregorio Bustamante, un heroe que denuncia diante do mundo a ditadura trujillista e os seus manexos para exportar o terror a toda América Latina, cualifica a Almoina de “indigno gallego”. É daquela Almoina un covarde acomodaticio, disposto a todo para que a súa familia viva ben despois do cárcere e do terror en España? É realmente un “indigno gallego”, como o acusa Bustamante?

Almoina deféndese destas acusacións cun libro laudatorio titulado Yo fui secretario de Trujillo, onde pon ao tolo ditador polas nubes. Como di o heroico Bustamante, Almoina é un home indigno.

En canto pode, Almoina saca a familia da República Dominicana e foxe el tamén. Dende o exterior inicia un dobre xogo de denuncias e de enganos, de cambios de domicilio e de prevención, porque sabe que o servizo segredo de Trujillo caeu por fin na conta: Bustamante é el. Almoina e Bustamante son a mesma persoa. Unha persoa condenada a morte.

Heroe ou covarde? É certo que coa obra laudatoria de Trujillo escrita por Almoina pagou a reimpresión do libro Una satrapía en el Caribe, de Bustamante? É certo que a súa familia corría perigo –non sería a primeira vez que Trujillo ordenaba masacrar unha familia enteira–, pero… realmente quen era Almoina? Un home abandonado por todos, agás pola súa propia familia. Un día antes de morrer renunciara a levar revólver. Tempo antes volvera a ser católico practicante. É asasinado por axentes trujillistas en México, cando volvía da misa. Nunha contradición máis da súa vida, el, masón, volvera atoparse coa Igrexa.
VOG
Presenta o profesor e escritor Claudio Rodríguez Fer.

Pelerinaxes Pelerinaxes / Día 15 de Maio. Hora: 19:30 / Salón de Actos da Casa do Saber
Director: Simone Saibene
País: España
Ano: 2016
Duración: 74 minutos
Guión: Simone Saibene
Dirección de Fotografía: Jairo Iglesias

INTÉRPRETES: Carmen Méndez, Isabel Risco, Xoel Yáñez, Alfonso Míguez, Ruth Sabucedo

SINOPSE:

Pelerinaxes é un filme inspirado no libro Pelerinaxes I de Ramón Otero Pedrayo. A película fai o mesmo camiño que fixeron, en 1927, Otero Pedrayo, Vicente Risco e Ben-Cho-Shey, entre Ourense e Santo André de Teixido (Cedeira). Un camiño que comeza na Praza do Ferro da cidade das Burgas e percorre diversas localidades das provincias de Ourense, Lugo e A Coruña (Vilamarín, Monterroso, Palas de Rei, Lugo, Rábade, Vilalba, As Pontes de García Rodríguez e Ortigueira, entre outros).
Protagoniza a longametraxe a actriz lucense Carmen Méndez, que encarna a Luzía, unha investigadora licenciada en audiovisual que percorre as oito etapas do camiño entre Ourense e Santo André, para rematar un proxecto audiovisual iniciado na universidade sobre o libro de Otero Pedrayo xunto a un compañeiro, falecido anos atrás nun accidente. Pelerinaxes, que se sitúa entre a ficción e o documental, alterna o traxecto realizado pola protagonista con entrevistas a homes e mulleres, figuras do mundo cultural galego coma Laura Tato, Valentín Carrera, Patricia Arias Chachero, Susana Reboreda, Carme Fernández-Pérez Sanjulián, Pablo Gallego, Luis Martínez Risco ou Alberto Allegue.
A finalidade da película é dar a coñecer ese camiño tan importante realizado polos pais da cultura galega, e facelo dunha forma máis actual e entretida. Pelerinaxes fai unha homenaxe a esa viaxe na busca da identidade galega, sobre o mesmo camiño de Ourense a Santo André de Teixido a día de hoxe e a través dos ollos dunha moza que investiga sobre o seu pasado. Os camiños pouco andados coma este, hai que ensinalos. O relato de Otero é algo máis que un diario de viaxe: é todo un universo cultural o que pousa e aniña entre as notas de Pelerinaxes. O documental visibiliza unha Galicia pouco coñecida e, ao mesmo tempo, pona en valor dende un punto de vista cultural e turístico.
VOG
Presenta o director, Simone Saibene
 

Pharos of Chaos Pharos of Chaos / Día 22 de Maio. Hora: 19:30 / Salón de Actos da Casa do Saber
Director: Wolf-Eckart Bühler, Manfred Blank
País: Alemaña
Ano: 1983
Xénero: Documental / Biografía
Duración: 114 minutos
Produción: Red Harvest Film
Guión: Wolf-Eckart Bühler, Manfred Blank, Hella Kothman
Dirección de Fotografía: Bernd Fiedler
Montaxe: Manfred Blank

INTÉRPRETES: Sterling Hayden, Charles Brauer, Burkhard Driest

SINOPSE:

A irresistible personalidade dun Sterling Hayden xa retirado en Francia descóbrenos neste magnético documental unha figura que vai alén do actor que nos namorou en La jungla de asfalto ou Johnny Guitar. Botando a vista atrás só tres anos antes da súa morte, o intérprete, experto mariñeiro, relátanos como chegou a comandar un convoi de 400 barcos con provisións para os partisanos iugoslavos asediados polo exército alemán ou como, moito antes diso, xa dera a volta ao mundo no seu navío. Este flirtear con Tito levouno a vincularse fugazmente ao partido comunista, polo que tivo que render contas ante o Comité de Actividades Antiestadounidenses. Baixo ameaza delatou a varios dos seus compañeiros, o que lle valeu apoios en Hollywood mais deixoulle unha fonda ferida que tentaría pechar coa bebida e que acabaría por repercutir na súa decisión de deixar a actuación. Estes e outros acontecementos son os que confesa ante a cámara de Bühler, quen tamén adaptaría a súa aclamada autobiografía á gran pantalla.
VOSE