Hai máis de dez anos que os enfermos mentais do Hospital Psiquiátrico J.T. Borda, en Bos Aires, falan a través da súa propia  emisora: Radio La Colifata. A súa visión do  mundo quizais  non  sexa  politicamente  correcta, pero o interese   polas súas opinións  e o terapéutico  do proxecto atraeron a personaxes  do talle do  xornalista  Lalo  Mir e  o cantante  Manu  Chao. Moitas radios  latinas compraron os seus programas e varios psiquiátricos probaron a idea. Por fin "os tolos" teñen a palabra.
LT22 Radio La Colifata mostra o proxecto pioneiro do Hospital Psiquiátrico Borda (Buenos  Aires)  de crear  unha  emisora  para  que  os enfermos  mentais  poidan expresarse  libremente  e  manteñan  o  contacto  coa  sociedade.  Trátase dunha especie de  terapia  social que xa tivo os seus resultados e que fixo dos "colifatos" persoas admiradas no mundo das ondas. Un dos grandes  apoios do proxecto é o cantante   Manu  Chao, colaborador  habitual  dos  programas  de   La  Colifata  e promotor de varias iniciativas para axudar aos seus  integrantes,  dende  un disco producido en Barcelona, ata un concerto benéfico nun estadio de fútbol.
O director  do documental  é un  dos   responsables  dos  vídeos  de  Manu  Chao, Carlos  Larrondo. O documental  percorre Argentina,  e  tamén  outras  capitais  europeas que  se  sumaron  á idea. Entre outros, Hospitais Psiquiátricos de Barcelona, Paris, Toulouse, Mantova e Trieste.

Con esta proxección o Club Cultural Valle-Inclán súmase aos actos programados co gallo da exposición de fotografías de José Reigosa  "Entre Marbella e Torremolinos"