O Sur é a segunda entrega da biloxía Shoots from Abyssinia. Parten ambas do desexo do director de que os seus fillos Abdul e Abdi realicen a viaxe iniciática das súas vidas. Se no primeiro filme, Abdul acompañado da sombra de seu pai e coa guía Historia da Etiópia de Pedro Páez, mergúllase nas orixes do seu país centrándose na metade norte de Etiopía, neste segundo filme é o pequeno dos irmáns, Abdi, o que fai a súa persoal viaxe na procura das raíces biolóxicas. Da man do seu irmán maior, métese de cheo na cultura Gurage, a etnia dos seus proxenitores, a súa propia etnia. Esta segunda viaxe, sen lugar a dúbidas, era o complemento que permitiría coñecer e recoñecer este grande país na paisaxe e na paisanaxe.