Unha comedia made in Germany sobre un tema que moitos cineastas evitan para "non meter a pata": trátase de persoas con diferentes tipos de discapacidades.

A vida acelerada de Oliver (Tom Schilling), un xestor de fondos financeiros, cambia por completo cando queda paralítico tras causar un grave accidente de coche. Á parte de ter o corpo esnaquizado e sentirse humillado pola súa nova discapacidade, Oliver ten outro problema: ten que poñer a salvo o seu diñeiro negro en Suíza antes de que o pillen as autoridades alemás. Ocórreselle unha idea tan sinxela como brillante: organizar unha excursión para o grupo de discapacitados da residencia onde vive. Así, o grupo Os peixes dourados emprende unha excursión en furgoneta. Acompañados por unha asistente e un condutor, viaxan a un centro de "terapia de montar en camelos" nas montañas suízas. A película conta cunha repartición excelente e un guion hilarante. O humor desta road movie non se frea ante ninguén. Ningunha persoa está a salvo, a risa cúrao todo.