Drama francés que retrata a vida nun lupanar no París do século XIX. Historias entrelazadas. A convivencia da Madame coas prostitutas e os clientes; o libro de anotacións de ingresos e débedas de cada unha das internas; os abusos dos burgueses, artistas, aristócratas e outra clientela, tamén os segredos, alegrías e penas compartidos. E o tráxico suceso: un home desfigura a faciana dunha prostituta. A cicatriz resultante debuxará un sorriso que a marcará de por vida. Historias entrelazadas cunha estética de cadro Manet, Renoir, Toulouse Lautrec… e un enfoque social daquelas casas de alterne nas que a xente se reunía para tomar unha copa, falar, escoitar ou para desafogar a súa libido.