Amor baixo o espiño branco cóntanos a historia de Jing, unha colexiala inxenua da cidade que debe trasladarse a unha remota vila na montaña para a súa "reeducación" durante a Revolución Cultural. O seu pai foi encarcerado por "dereitista" e a súa nai loita para alimentar aos seus tres fillos. Jing sabe que tanto o seu futuro coma o benestar da súa familia dependen do seu bo comportamento en opinión das autoridades. Abondaría cun erro para arruinar as súas vidas. Pero a súa prudente e tranquila existencia vese trastornada cando se namora de Sun, o encantador fillo dun militar de elite. Debido á diferenza social que os separa, un romance entre eles é impensable; máis aínda, perigoso. Pero a atracción é mutua, poderosa e innegable. Jing intenta resistirse, pero Sun perséguea, mesmo despois de que a rapaza regrese á cidade. O amor entre ambos os dous florece; é un amor puro, apaixonado e secreto. Ninguén debe decatarse, e menos aínda a nai de Jing. De pronto, Sun desaparece. Cando volve, Jing decátase de que algo cambiou. Deberá revisar as súas ideas acerca do amor, a honra e a lealdade antes de decidir no que cre realmente. A vida de ambos os dous nunca volverá ser a mesma.