Nunha  vila  de  Krekovice, preto de  Praga, os  habitantes  viven organizados nunha cooperativa, herdanza do réxime soviético instalado en Checoslovaquia dende o fin de la Segunda Guerra Mundial. Por este motivo, todos son responsables de Otík, un rapaz atrasado que vive só. Dentro desta estrutura solidaria, Otík traballa como axudante de Pávek, condutor dun camión. Tras unha longa tempada xuntos, Pávek decide prescindir do seu compañeiro, pois é demasiado despistado e dálle máis problemas que alegrías. Outro veciño da vila deberá admitir ao mozo como axudante. A este problema súmaselle outro: alguén está a intentar apropiarse da casa de Otík sen que este se decate. Os cidadáns e o director da cooperativa deberán atopar solución a istos asuntos, mentres ao seu arredor vanse sucedendo os accidentes de coche dun médico hedonista, namoramentos xuvenís, e adulterios. A ironía, tenrura e humor serven a Jirí Menzel para tecer esta espléndida comedia coral.

Jirí Menzel (1938), un dos mellores directores do cinema checo, gañador do Oscar pola súa película Trens rigorosamente vixiados, considerado un dos filmes do cumio do cinema europeo. Representante de A Nova Onda Checa nos anos 60.